كيفاش دار ليها الدكتور مجد ناجي

باش نكملوا معاك السلسلة اللي بدينها اللي كاتهضر على الناس اللي نجحوا فحياتهوم وكيفاش داروا ليها.

واش بيغيتي ربي يوسع ليك فالرزق ديالك تهلا فوالديك ودير اي حاجة اللي تقدر عليها باش ترسم الابتسامة فوجوهوم.

اليوم غادي نهضروا على الدور الكبير اللي كايلعبوا رضاة الوالدين فالنجاح ديالك، والقصة ديال اليوم كاتهضر على واحد الطبيب ديال الاسنان معروف بزاف فالعالم وكاع مشاهير العالم دازو عندو فالعيادة ديالو فمدينة دبي ، هاد الطبيب سميتو الدكتور مجد ناجي.

مجد ناجي هو من اصل فلسطيني، تخرج من كلية طب الاسنان ومشى لدبي فرحان وكان كايعتاقد باللي هير مع الدخلة ديال دبي غادي يلقى النجاح كايتسناه وغادي يخدم ويدير الفلوس ويعيش الحياة.

المهم وصل لدبي ومشا لواحد الحي صغير وكرا واحد الشقة صغيرة دار فيها عيادة على قد جيبوا، ولكن للاسف داز الشهر الاول والشهر الثاني والثالث والو ، حتى واحد ما جا عندو العيادة ديالو ، والكرا ديال الشقة بدات كاتجمع عليه، ومول الشقة كايصبر عليه.

الدكتور ناجي جلس فالكرسي وضرب طلة فجيبوا لقى 1000 درهم اماراتي هي اللي كايكساب واللي هي تقريبا 2500 درهم ديالنا، ماتخلصلوش حتى نص شهر ديال الكرا، وشويا وهو جالس كايخمم شنو يدير وهو يدق عليه مول الشقة قال ليه الا ماخلصتنيش اليوم غادي نجيب ليك البوليس وندخلك الحبس.

الدكتور ناجي من بعد الهضرة اللي سمع ولا كايشوف هير الضبابة ، كيفاش الحلم اللي كنت كانشوف منين هاجرت بلادي رجع بحال شي كابوس بغيت نفيق منو.

هبط من العيادة ديالو وهو ماشايفش حتى الطريق ولا فين غادي، وشويا اتصل بيه الوالد ديالو من فلسطين وقاليه : ” ولدي مجد راه انا وماماك تقهرنا والقضية مزيرة عندنا وبغيناك تسيفط لينا شي فلوس الله يرضي عليك

الدكتور مجد سول الوالد ديالو شحال محتاج ، ورد عليه الوالد ديالو قاليه بغينا شي 1000 درهم . ودار يديه فجيبوا وبدا يخمم واش نعطي هاد الف درهم اللي كانكساب للمول الشقة باش نسكتوا واحد 15 ليوم ولا نعطيها لوالديا اللي مزيريين.

من بعد خدا قرار وعاود اتصل بالوالد ديالو وقاليه راه 1000 درهم اليوم غادي تكون عندك، ومشا سمح فالعيادة مفتوحة وفكلشي ومشا لمكتب تحويل الاموال وسيفط الف درهم لوالديه فلسطين.

ومنين سيفط الفلوس بدا كايخمم عاوتاني ، صافي هادي هي النهاية الجيب متقوب وجلس فقهوة اللي حتى الثمن باش يخلص ماعندوش وبدا كايخمم شحال دالحبس غادي يدوز منين غادي يشدوه البوليس اليوم والا خرج من الحبس واش يرجع لفلسطين ولا يقلب على خدمة فالامارات…

وهو كايخمم فهاد الامور ، صونا عاوتاني التيليفون وهاد المرة السكريتيرة ديالو اللي معاه فالعيادة كاتقولو اجي دابا دابا دابا ، العيادة عامرة بالكليان، وهو يتعجب كيفاش العيادة شهور وهي خاوية ماجا ليها حتى كليان واليوم تعمار دقة وحدة ، وهو فهم باللي السكريتيرة ديالو اللي حتى هي كاتسالو شهر دالخدمة ربما دارت قالب مع مول الشقة باش مايهربش، صافي قال فعقلوا داكشي اللي كاين ، ماشي مشكل نمشي واللي ليها ليها القانون تابعنا تابعنا وماعندنا منو هروب.

الدكتور ناجي هير وصل العيادة تعجب صحابوا غادي يلقا البوليس ولكن فعلا السكريتيرة ديالو ماكدباتش فعلا العيادة عامرة دراري وعيالات ، ومنين سول السكريتيرة ديالو كيفاش هادو جاو دقة وحدة؟

ومن بعد فهم باللي شي شيخ امارتي خانز فلوس مزوج 4 عيالات والد معاهوم شلا اطفال، وهاد الشيخ عندو واحد الاسلوب كاييديرو وهو انه اي حاحة كايديرها سواء الا مشا عند الطبيب او شرا الذهب او العاب… كايديرها دقة وحدة لعيالاتو بربعة بولادو، وهاد الشيخ مولف كايمشي عند شي طبيب لقاه ساد ومابغاش يرجع للدار ديالو وبانت ليه عيادة الدكتور ناجي وهو يدخل ليها.

وكايعاود الدكتور ناجي فالقصة ديالو انه بدا خدام داك النهار كامل هير مع هاد الشيخ والاسرة ديالو ، ها اللي عندو ضرسة مسوسة ها اللي خاصوا التقويم، ها اللي خاصو تعمار ضروس….وكمل اليوم التالي والثالث هير مع هاد الاسرة الكبيرة .

ومورها شد الخلصة من عند الشيخ اللي خلص بيها الشهورا اللي كايسالوه وشاط ليه الخير مزال.

الدكتور ناجي فالحوارات ديالو كايقسم بالله العظيم انه من داك النهار وهو طالع بحال الصاروخ نجاح مور نجاح.

اليوم الدكتور مجد ناجي كايتعتابر واحد من انجح واشهر اطباء الاسنان فالعالم كامل والعيادة ديالو من اشهر العيادات ، وكبرات ورجعات علامة تجارية معروفة وعندها فروع فانحاء الامارات.

فواحد الاستجواب صحفي سولوه على سر نجاح عيادة ليبيرتي جاوبهوم السر ديالي هو نهار جبدت اللي عندي فجيبي وعطيتوا للوالد.

الا كنتي كاتعتاقد باللي هاد القصة تستاهل تبارتاجا ، بارتاجيها باش تفيق صحابك.

والا بغيتي شي قصص اخرى من هاد النوع ، كاين واحد الكتاب فابور الا بغيتي تقراه فهاد الرابط